Monthly Archives: March 2009

Bleikjurnar á Grænlandi voru brjálaðar í Beyki. Þessar tóku Beyki nr. 12.

Nú styttist óðum í að veiðimenn fari á stjá með stengur sínar. Lengi höfum við hér á Krafla.is verið litlir stuðningsmenn vorveiði sem hefst 1. apríl. Veiði á niðurgöngufiski er fyrirbrigði sem maður hefur lengi átt erfitt með að skilja. Þó er hægt að skilja þetta að einhverju leyti ef menn sleppa hverjum einasta fiski sem þeir veiða. Skiljum við ekki tilganginn í því að drepa og hirða niðurgöngufisk í tugatali. Skorum við á veiðimenn sem á annað borð fara í vorveiði að sleppa öllum fiski.

Veiðimenn velta því mjög fyrir sér þessa dagana hvernig sala laxveiðileyfa gangi fyrir komandi sumar. Ber mönnum ekki saman um stöðuna. Margir veiðileyfasalar sem við höfum heyrt af segja söluna hafa verið mjög góða og lítið sé eftir af lausum dögum í sumar. Veiðimenn sem við höfum heyrt í segjast kannast við þessa stöðu. ,,Það er líklegt að búið sé að bóka töluvert af dögum í flestum ánum. Samkvæmt mínum heimildum eiga veiðimenn hins vegar í mörgum tilfellum eftir að greiða fyrir þessi veiðileyfi og þá munu leigutakar standa frammi fyrir miklum vandamálum. Ég held að þegar júní rennur upp verði margir dagar óseldir og þá verði hægt að ná sér í dag eða daga fyrir ótrúlega lítinn pening," sagði viðmælandi okkar. Innan skamms ætti að koma í ljós hvert veiðimaðurinn hefur rétt fyrir sér.

Veiðimenn sem hafa áhuga á stangaveiði á Grænlandi ættu að leggja leið sína í verslunina Ellingsen í dag, laugardag. Þar verður í gangi öflug kynning á veiðisvæðum í þessu magnaða landi en það er Flugfélag Íslands sem sér um söluna. Á Grænlandi er mögnuð bleikjuveiði og þar hafa okkar flugur oftar en ekki komið við sögu. Höfum við heyrt fjölmargar sögur af silungaflugum okkar, Króknum, Mýslu, Beyki og Beyglu (nr. 12-16)  og eins hafa Kröflurnar í ýmsum útgáfum reynst afar vel í grænlenskum ám og vötnum. Er okkur þá sérstaklega minnisstæð frásögn Hjálmars Árnasonar, fyrrverandi alþingismanns, hér á Krafla.is sem lagði leið sína til Grænlands fyrir tveimur árum. Hafði þessi þekkti aðdáandi bresku flugunnar Frances reynt marga liti af Frances án árangurs er hann hnýtti Kröfluna á taumendann og við tók linnulítil löndun. Var væn bleikja á í hverju kasti.

Veiðisýningin sem vera átti í Perlunni í byrjun maí hefur verið blásin af. Ólafur M. Jóhannesson, forsprakki sýningarinnar, segir það mikil vonbrigði að ekki verði af sýningunni. ,,Við vorum vongóðir lengi vel og um tíma leit út fyrir að þetta gæti orðið hin glæsilegasta sýning. Þegar leið á fóru fyrirtæki hins vegar að afboða sig hvert af öðru og báru fyrir sig kreppunni og óvissu hvað framtíðina varðar. Fljótlega var þá ljóst að grundvöllur fyrir sýningunni var ekki lengur fyrir hendi og því það eina rétta að hætta við sýninguna," sagði Ólafur. Samkvæmt okkar heimildum verður stefnt að sýningu að ári. Veiðisýningin var síðast í Smáralind og þótti takast frábærlega í alla staði og sóttu um 6000 veiðimenn sýninguna.

Eftir rúman klukkutíma síðasta morguninn í Norðlingafljóti í veiðistað nr. 35 höfðu þessir sex laxar tekið svarta Kröflu keilutúpu 1/2".

30% hækkun í Norðlingafljóti. Veiðimenn eru mikið að velta fyrir sér verði á veiðileyfum næsta sumar. Í mjög mörgum tilfellum mun verðið lækka, hækka örlítið eða haldast óbreytt. Það er þess vegna skrítin þróun og í litlu samræmi við gang mála í flestum ám að leigutaki Norðlingafljóts tók upp á því að hækka verð á veiðileyfum frá því í fyrra um 30%. Nei, þetta er ekki prentvilla, 30%. Við hér á Krafla.is vorum í Norðlingafljóti sl. sumar, ekki á besta tíma en dagurinn kostaði engu að síður 50 þúsund. Er þar um strípað verð að ræða því ekkert er innifalið, sólarhringsgjald fyrir veiðihúsið var 4000 krónur og þá eftir að borga mat og annan kost. Í sumar eru þessir dagar á 65 þúsund. Vissulega er Norðlingafljót stórbrotin laxveiðiá, býður upp á marga skemmtilega veiðistaði og alltaf nægilegt vatnsmagn. Við veiddum 70 laxa í fyrra, nær alla á Kröflur og sönnuðu Kröflurnar enn einu sinni hversu öflugar þær eru. Ekki verður af veiðitúr okkar í sumar. Einfalt mál. Við látum ekki bjóða okkur 30% hækkun á milli ára.

Ekki fögur mynd af veiðistaðnum Heyvaði í Elliðaánum. Mengunin hreinn viðbjóður og nú á að byggja hesthús yfir 600 hross á árbakkanum. Í hvaða heimi lifir það fólk sem leyfir slíkar framkvæmdir?

Enn einu sinni eiga Elliðaárnar undir högg að sækja. Og við því mátti svo sem búast ef í huga eru hafðar yfirlýsingar stjórnmálamanna undanfarin misserri og afskiptaleysið sem hefur verið algjört. Elliðaárnar eru fyrir margra hluta sakir og hafa lengi verið sérstakt fyrirbrigði í náttúrunni. Fróðir menn hafa oft opinberað getuleysi borgaryfirvalda þegar Elliðaárnar eru annars vegar.

Nú á að byggja hesthús fyrir 600 hesta á bökkum ánna, nánar tiltekið við einn fallegasta stað árinnar, Heyvað. Auðvitað er mönnum orða vant þegar svona hugmyndir koma fram og framkvæmdir fylgja í kjölfarið. Í stað þess að flytja hesthúsin öll úr Víðidalnum, langt út fyrir byggðina, á að bæta stórlega við hesthúsabyggðina, í miðju úthverfi borgarinnar.

Á tyllidögum hafa forráðamenn Reykjavíkurborgar montað sig af Elliðaánum, en öruggt má telja að hvergi annars staðar en í Reykjavík rennur laxveiðiá í gegnum miðja höfuðborg. Þegar á reynir kemur það í ljós aftur og aftur að forráðamönnum borgarinnar er skítsama um Elliðaárnar. Gildir þá einu í hvaða flokki þeir eru.

Nýverið var borgarstjórinn núverandi, Hanna Birna Kristjánsdóttir, í viðtali í Færibandinu, þætti Bubba Morthens á RUV. Hún sagði Elliðaárnar ótrúlega verðmætar. Hins vegar segðu allir umhverfissérfræðingar að þetta væri í góðu lagi og að hesthús fyrir 600 hesta á árbakkanum myndu alls ekki raska ró þessa svæðis.

Kannski erum við hér komin að mergi málsins. Ljóst er að borgarstjóri hefur ekki sans fyrir lífríki Elliðaánna og mikilvægi þeirra. Ef svo væri hefði hún haft bein í nefinu til að hafna þessum framkvæmdum strax og sparað sér þá fyrirhöfn að leita til ,,umhverfissérfræðinganna". Borgarstjórinn leitar til sérfræðinganna sem segja að þetta sé allt í góðu lagi. Í áratugi hafa forráðamenn borgarinnar aldrei haft kjark til að standa heilshugar með Elliðaánum. Stjórnmálamennirnir hafa því miður farið í blindni eftir ráðum sérfræðinga sem margir hafa gagnrýnt harðlega.

Ég hef árum saman beitt mér fyrir verndun Elliðaánna og marga undanfarna áratugi fylgdist ég með öflugri baráttu föður míns fyrir lífríki ánna. Hef ég skrifað greinar í blöð og tímarit en lengi talað fyrir daufum eyrum. Nú hafa Elliðaárnar verið í hlutverki öskuhauga í allmörg ár. Ósasvæði ánna verið einn samfelldur skítahaugur árum saman en engu að síður hefur lífríkið verið ótrúlega sterkt og unnið frækna sigra. Einhverjar örlitlar tilraunir hafa menn haft í frammi varðandi það að hefta mengun ánna og líkast til hafa þær veikburða tilraunir skilað einhverri lítilli aukningu, bæði hvað veiði og laxagengd varðar.

Hins vegar vantar enn gríðarlega mikið upp á að Elliðaárnar séu að skila álíka veiði og hér á árum áður. Verða menn líkast til aldrei vitni aftur að slíkum aflatölum þegar á þriðja þúsund laxar veiddust í ánum og 6-8000 laxar gengu í árnar árlega um teljara. Ég er þess fullviss að hægt sé að endurreisa fiskistofn Elliðaánna. Til þess þarf að efla til muna starfið við að sporna við mengun í ánum, sérstaklega á ósasvæðinu sem er afar viðkvæmt svæði þegar gönguseiði árinnar eru annars vegar. Þegar mengunarmálin eru komin í lag þarf að sleppa miklu magni kviðpokaseiða á efsta hluta vatnasvæðis Elliðaánna. Slíkt hefur áður verið gert með stórkostlegum árangri og fylgdu metveiðisumur í kjölfar slíkra sleppinga. Veiðimálastofnun, sem að mínu mati hefur fengið alltof mikil völd við Elliðaárnar, er ekki þessarar skoðunar. Árum saman hefur stofnunin fengið fjárframlög til rannsókna á lífríki Elliðaánna. Hverju hafa þær skilað?

Stefán Kristjánsson

Hér hefur þroskuð tveggja ára hrygna látið undan og tekið rauðu Kröfluna.

Vorið er skammt undan og í maí fögnum við á Krafla.is fjögurra ára afmæli okkar á markaðnum í flugusölu. Á þessum stutta tíma hafa flugur okkar vakið mikla athygli fyrir afburða gæði og fallegt útlit. Og þeir sem reynt hafa flugurnar hafa ekki orðið fyrir vonbrigðum. Kröflurnar eru án efa með skæðustu flugum á markaðnum og áratuga löng reynsla talar sínu máli. Margir af öflugustu fluguveiðimönnum landsins hafa þegar tekið ástfóstri við Kröfluflugurnar. Þar má nefna Rafn Hafnfjörð og Guðmund Stefán Maríasson og marga fleiri.

Allar pantanir sem okkur hafa borist á Krafla.is höfum við afgreitt þannig að nokkrar aukaflugur hafa fylgt með. Það er ekkert leyndarmál að okkar flugur eru ekki ódýrustu flugurnar á markaðnum í dag. Ef fluguveiðimenn vilja spara nokkra tíkalla og kaupa ódýrari flugur og túpur hjá öðrum aðilum þá gerum við ekki athugasemdir við það. Þegar þær flugur fara hins vegar að rakna upp vegna þess að hausinn er ekki fjórlakkaður og öll hnýtingin er ekki eins og hún á að vera að okkar mati, þá koma vonbrigðin í ljós og veiðimenn uppgötva að þeir hafa verið blekktir. Hér má nefna þá staðreynd að á þeim fjórum árum sem við höfum verið að selja flugur á Krafla.is höfum við fengið eina kvörtun. Eina kvörtun!!!!

SilungaKrafla orange - eins og hún á að vera.

Á flugumarkaði sem öðrum mörkuðum ríkir samkeppni og lengstum hefur hún verið í lagi. Þó hefur borið á lúalegum brögðum manna til að eigna sér verk annarra hönnuða og höfum við orðið vitni að miður skemmtilegum tilraunum eins ,,fluguhönnuðar" til að skreyta sig með stolnum fjöðrum. Og ekki í fyrsta skipti.
Fluguveiðimenn muna og vita hver hannaði appalsínugulu Kröfluna, Kristján Gíslason árið 1977 í kjölfar Kröfluelda. Til að gera langa sögu stutta birtum við hér mynd af SilungaKröflunni okkar og svo hina lúalegu tilraun Dr. Jónasar á Frances.is til að eigna sér afar lélega útgáfu af flugunni sem hann kýs að kalla Súdda. Um tíma stóð á síðunni hjá Frances.is: ,,þessa flugu hannaði ég fyrir vin minn Súdda í Breiðdalsá."

Við vonum að Súddi sé ánægður með stuldinn og hafi glaðst yfir gjöfinni og þessari stórmerkilegu hönnun Dr. Jónasar sem minnir um margt á stórmerka hönnun Dr. Jónasar á Frances flugunni bresku sem hann hefur eignað sér með örlitlum breytingum undanfarna áratugi.
Hversu lágt geta menn lagst og hversu miklir aular geta menn verið?
Fyrir því eru greinilega engin takmörk.

,,Hönnun Dr. Jónasar." Mikil er sköpunargáfa þessa manns. Tveimur vaskakeðjuaugum bætt við og þá þóttist doktorinn hafa uppgötvað nýja flugu. Ömurleg tilraun til að stela hugmynd manns sem hannaði alvöru flugur. Alvöru fluguveiðimenn sjá auðvitað í gegnum svona depurð og hugmyndaleysi.

Steinar Petersen á Iðu í fyrra. Mikið af laxi var við Iðu þennan dag og Kraflan var að gefa vel, reyndar nær alla laxana. Alls komu 15 laxar á land og allir á Kröflur í ýmsum litum og stærðum.

Það er staðreynd eitt árið enn að vorið nálgast og veiðivertíðin þar með. Við erum þó ekki á því að vertíðin hefjist 1. apríl. Í það minnsta er það skoðun okkar á Krafla.is að veiði á niðurgöngufiski sé ekki samboðin alvöru veiðimönnum. Skelþunnir fiskar, grindhoraðir, þurfa að eiga greiða för til sjávar. Óþolinmóðir veiðimenn í skítakulda að vori eiga að sjá sóma sinn í því að láta þessa fiska í friði.
Vertíðin hefst sem sagt 1. maí þegar mörg vötnin opna, til að mynda Elliðavatn. Síðan kemur blessuð Norðuráin með alla sína fegurð og opnun 5. júní.

Nú förum við að vakna til lífsins hér á Krafla.is enda stutt í jafndægur á vori. Flugur okkar voru að gera stórkostlega hluti í fyrra. Veiðimönnum ber saman, flugurnar eru sterkar og endingargóðar og um fram allt veiðnar.

Þær eru margar veiðisögurnar sem sagðar hafa verið frá liðnu sumri. Hér er ein skemmtileg en hún greinir frá veiðiverði Norðurár, Grétari Þorgeirssyni, sem átti erfitt með sig sama dag og handboltalandslið Íslands var að leika gegn Spáni í undanúrslitum á Ólympíuleikunum í handbolta. Veiði hafði verið frekar róleg og sökum þess að íslenska landsliðið var að leika gegn Spáni í 4ra liða úrslitum á Ólympíuleikum höfðu margir veiðimenn ákveðið að sofa út og horfa síðan á leikinn. Veiðivörðurinn var órólegur og svo fór að lokum að fjöldi veiðimanna skoraði á hann að fara og veiða ef áhuginn á handboltanum væri ekki mikill. Grétar tók menn á orðinu. Fyrir kl. sjö um morguninn ók hann sem leið lá upp Norðurárdalinn og langleiðina upp að Símastreng. Í nágrenni við hylinn setti hann fljótlega í þrjá laxa og tóku þeir allir Kolskegg Long Wing plasttúpu 1" frá okkur hér á Krafla.is.  Þá tók löngunin í handboltalandsleikinn völdin. Grétar ók sem óður væri niður Norðurárdalinn og var kominn nærri Bifröst þegar staðan var orðin nánast óbærileg fyrir Íslendinga. Mat hans var að leikurinn væri tapaður. Því var farartækinu snúið nánast á punktinum og ekið á fullri ferð á ný upp Norðurárdalinn. Aftur á sama veiðistaðinn. Aftur hnýtti Grétar á Kolskegg Long Wing 1" plasttúpuna og á skömmum tíma tóku hana fjórir laxar til viðbótar.  ,,Þetta var ógleymanlegur morgunn og greinilegt að Kolskeggur er hrikalega sterk fluga. Þegar maður lítur yfir ferilinn í fluguveiðiveiðinni hlýtur þessi morgunn að teljast einn sá eftirminnilegasti til þessa," sagði Grétar Þorgeirsson í samtali við Krafla.is

Kolskeggur - hrikalega sterk fluga og gaf mjög góða veiði sl. sumar, t.d. í Langá og Norðurá.