Monthly Archives: August 2009

Svört Kröflutúpa losuð úr fiski við Iðu. Veiði við Iðu hefur gengið ágætlega í sumar og hafa flugur frá Krafla.is haft algjöra yfirburði yfir aðrar flugur í sumar.

Við heyrðum í gærkvöldi að veiðitíma loknum af ferðum veiðimanna á tveimur veiðisvæðum sem hafa verið að gefa góða veiði í sumar. Og þar hafa Kröfluflugur verið að gera góða hluti.

Þriggja stanga holl við Iðu sem lauk veiðum á hádegi í gær fékk 6 laxa. Hollið var við veiðar seinni part fimmtudags og fyrri part föstudags. Nokkuð sást af laxi á svæðinu en flestir voru utan kastfæris, langt úti í jökli. Allir laxarnir sem náðust tóku Kröflur í ýmsum stærðum og litum. Og nánast allir laxarnir tóku á sama blettinum, skáhalt upp af stólunum. Þetta skilja vanir menn við Iðu.

Við heyrðum einnig í veiðimönnum í gærkvöldi sem voru við veiðar í Húseyjarkvísl og eru mjög kunnugir á þeim slóðum.

Þeir höfðu aðeins veitt seinni part föstudags og eiga að ljúka veiði á hádegi á mánudag. ,,Þetta voru mjög erfiðar aðstæður í dag. Mikið rok og aðeins 6 stiga hiti. Þetta eru ekki kjöraðstæður en við náðum samt tveimur löxum. Annar tók Kolskegg og hinn Kröflu Eld. Við erum að vona að aðstæður lagist og þá mun þetta ganga betur," sagði heimildamaður okkar við Húseyjarkvísl í gærkvöldi. Við munum fylgjast með og birta hér nýjar fréttir um leið og þær berast okkur.

Hörður Hafsteinsson með gríðarlega fallegan lax, 91 cm, sem tók svarta Kröflutúpu í Húseyjarkvísl.

Hilmir Jensson með laxinn glæsilega. 12 punda hrygna sem negldi orange Kröflutúpuna í fyrsta kasti.

,,Þetta var mjög skemmtilegt. Ég var lengi að ákveða hvaða flugu ég ætlaði að byrja með en á endanum var það Kolskeggur sem fór á taumendann. Eftir nokkur köst var lax búinn að taka Kolskegginn en hann slapp. Skömmu síðar tók 6 punda lax og viðureignin var mjög skemmtileg,"" sagði Hilmir Jensson í samtali við Krafla.is en hann var á dögunum við veiðar í Eystri Rangá og upplifði eftirminnilegan dag.

Aðstæður hjá Hilmi og félögum voru nokkuð erfiðar, mikið rok en undir kvöldið var veður orðið skaplegt. ,,Ég hafði séð nokkra laxa og auðvitað langaði mig mikið í annan alx. Það var skammt eftir af veiðitímanum þegar ég ákvað að setja ,,aggresívustu" Kröfluna sem ég var með í boxinu á tauminn. Tommulöng orange Krafla varð fyrir valinu og laxinn negldi hana í fyrsta kasti. Þetta var rosalega skemmtileg viðureign og þessi dagur verður mér auðvitað lengi minnisstæður. Og ekki skemmdi fyrir að þetta var stærsti laxinn úr Rangánni þennan daginn," sagði Hilmir Jensson.

Hilmir með Maríulaxinn á Rangárbökkum, 6 punda lax sem tók Kolskegg flottúpu.

Steinar Guðmundsson með 9 punda lax sem tók Kolskegginn með látum í Eldvatni. Og nokkrir sjóbirtingar höfðu list á honum að auki.

,,Það má með sanni segja að flugurnar frá Krafla.is hafi svo sannarlega slegið í gegn í sumar, í það minnsta  hefur undirritaður tekið miklu ástfóstri við þær enda hafa þær sannað sig sem afar sterkar og gjöfular flugur," sagði Steinar Guðmundsson en hann hefur veitt vel á flugurnar frá okkur á Krafla.is í sumar.

Steinar fékk nokkra sjóbirtinga, staðbundinn urriða og 9 punda lax á dögunum er hann var við veiðar í Eldvatni austur undir Kirkjubæjarklaustri. ,,Viðureignin við laxinn var afar skemmtileg og takan var ekki síðri. Sannaðist þar einu sinni enn hve flugur Kristjáns Gíslasonar eru sterkar í sjóbirtingi.

Steinar Guðmundsson með vænan staðbundinn urriða sem tók Kolskegg flottúpu í Eldvatni.

Við höfðum spurnir af norskum veiðimönnum sem voru á dögunum við veiðar í Rangánum. Veiddu þeir vel í fyrra en komu við hjá okkur á Krafla.is fyrir túrinn skömmu áður en þeir lögðu í hann austur fyrir fjall. Er skemmst frá því að segja að Norðmennirnir veiddu fimm sinnum meira núna en í fyrra. Helmingur laxanna kom á spón en allir flugulaxarnir á Kröfluflugur af ýmsum stærðum og gerðum.

Í sumar höfum við heyrt hreint magnaðar sögur af flugum okkar frá veiðimönnum sem þær hafa reynt. Höfum við meðal annars verið að heyra svakalegar sögur af flottúpunum Kolskeggi, Skröggi og Iðu. Sumar þessar lýsingar eru alveg magnaðar og margir sem trúa þeim mátulega. Við getum sagt frá stjórnarmani í SVFR sem leit við hjá okkur á dögunum er hann var á leið í Norðurá. Hlustaði hann á sögur af Kolskeggi og var greinilegt að honum fannst alveg nóg um. Við hjá Krafla.is báðum veiðimanninn að hringja í okkur þegar sá fyrsti væri kominn á land. Nokkrum klukkutímum síðar hringdi stjórnarmaðurinn. Hann hafði þá sett Kolskegginn á og landað fiski á hann í Krossholunni við Laxfoss í Norðurá. Og að hans sögn var takan sú magnaðasta sem hann hafði upplifað á ferli sínum sem fluguveiðimaður. Já, stundum eiga svakalegar veiðisögur við rök að styðjast.

Þorsteinn Guðmundsson ásamt dóttur sinni með fallegan lax sem tók Skrögg flottúpu. Þorsteinn fékk fjóra laxa og alla á Slrögginn.

,,Þetta var skemmtileg veiði og ég fékk alla 4 laxana mína á Skrögginn. Þetta voru mjög skemmtilegar tökur og greinilegt að Skröggurinn gefur Kolskeggi ekkert eftir. Þetta er greinilega hörkugóð fluga," sagði Þorsteinn Guðmundsson í samtali við Krafla.is í gær en um síðustu helgi var hann ásamt félögum sínum í Mokveiðifélaginu við veiðar vesturbakka Hólsár.

Hollið fékk 32 laxa. Þetta var fjölskylduferð með konur og börn og um helmingur laxanna kom á flugur. Flestir á Skrögg og Kolskegg en einig margir á Kröflutúpur í ýmsum litum, orange, rauða og Kröflu Eld. Þess má geta að holli'ð á undan þeim félögum fékk engan lax.

Sævar Örn Hafsteinsson með flottan 7 punda lax úr Hólsá sem tók Kolskegg flottúpu.

Þessi lax tók Kolskegg í Hólsánni og var hreinlega brjálaður allan tímann að sögn veiðimannsins Sævars Arnar. Stökk nær látlaust allan tímann.

Norðurá er að skríða í 2000 laxa og er það aðeins slakari veiði en í fyrra á sama tíma svo munar um 400 löxum. Í fyrra veiddust rúmlega 3000 laxar. Síðasta holl í Norðurá veiddi 61 lax. Mikil rigning var á Holtavörðuheiði í gærkvöldi og Norðurá var farin að taka lit. Mjög líklegt að áin verði mórauð og óveiðandi í dag föstudag enda áin vaxið hratt síðustu klukkustundir.

Þessi tók rauða Kröflutúpu í Hólsánni hjá Herði Hafsteinssyni.