Monthly Archives: July 2011

Verið að landa laxinum væna sem tók Kolskegg í veiðistaðnum Bálk í Hrútafjarðará á dögunum. Mynd fengin á strengir.is

Kolskeggur, eins og hann er seldur hjá Veiðibúðinni Kröflu Höfðabakka 3, er tvímælalaust að verða ein sterkasta laxveiðiflugan á markaðnum. Eru viðmælendur okkar jafnvel farnir að taka svo djúpt í árinni að fullyrða að ekkert vit sé í því fyrir veiðimenn að fara í veiðitúr án þess að hafa nokkur afbrigði af Kolskegg meðferðis.

Kolskeggur, sem hannaður var árið 1970 af Stefáni Kristjánssyni, er mjög einföld fluga og ákveðnar aðstæður við hönnun flugunnar ollu því að svo varð að vera. Sannast enn að einfaldir og fallegir hlutir virka best. Eitthvað, sem ekki hefur enn verið útskýrt að fullu, gerir það að verkum að Kolskeggur ergir og hvetur laxinn og framkallar hjá honum meiri grimmd en hann sýnir mörgum öðrum flugum. Hér og að þessu sinni nefnum við tvö nýleg dæmi um það hve brjálaður laxinn verður í návist Kolskeggs.

Og hér er Ómar Ómarsson búinn að landa hrygnunni fallegu sem var 90 cm löng. Mynd fengin af strengir.is

Veiðimaður sem nýverið var við veiðar í Hrútafjarðará á dögunum sagði okkur veiðisögu. ,,Við vorum ekki búnir að fá neitt. Það var ekki mjög mikið af fiski í ánni og enginn var að fá neitt. Menn voru búnir að kasta öllum fluguboxunum og ekkert gerðist. Þá datt mér í hug að setja á létta Koskegg túpu sem ég hafði keypt mért í Veiðibúðinni Kröflu fyrir túrinn. Strax í öðru kasti varð ég var við fisk. Og í næsta kasti á eftir var hann á. Þvílíkur áhugi og grimmd í tökunni. Ég landaði laxinum og var alsæll. Félagi minn er meira fyrir maðkveiði en fluguveiði. Hann hafði ekki fengið neitt. Ég bað hann um að taka stöngina mína sem og hann gerði. Og viti menn. Annar lax þreif Kolskegginn með miklum látum og honum var líka landað. Þarna tókum við félagarnir tvo laxa í sama hylnum á stuttum tíma," sagði veiðimaðurinn. Enn og aftur sannast að Kolskeggur gerir ekki mikinn usla í hyljum þar sem hann er notaður og er alls ekki, frekar en aðrar flottúpur okkar, það sprengiefni sem til dæmis Sunray er í hyljunum.

Kolskeggur er að margra mati ein allra sterkasta flugan á Íslandi í dag. Einföld hönnun árið 1970 og eitthvað er það í fasi flugunnar sem raskar ró laxins svo um munar.

Hér er annað dæmi um ótrúlegan áhuga hjá laxi á Kolskeggi. Sviðið var Hólshylur í ofanverðum Norðurárdal fyrir tveimur vikum. Þegar veiðimenn sem hér voru í aðalhlutverki voru á ferð við Hólshyl hafði ekki enn veiðst lax á ofanverðum dalnum. Veiðimaður var með leiðsögumanninum Grétari Þorgeirssyni. Eftir ágætt kast sýndi lax Kolskeggnum strax áhuga. Í öðru kasti var strax ráðist á Kolskegginn en laxinn hitti ekki fluguna. Sekúndum síðar var gerð önnur árás en enn hitti laxinn ekki fluguna. Þriðja árásin mistókst einnig. Þá sagði leiðsögumaðurinn veiðimanninum að hætta að draga Kolskegginn að sér. ,,Láttu hann bara liggja, hann kemur í hana." Sekúndu síðar skilaði fjórða árásin í einu og sama rennslinu árangri þegar 5 punda hrygnan straujaði Kolskegginn rétt rúmri stangarlengd frá veiðimanninum og var landað skömmu síðar. ,,Þetta var hreint ótrúleg sjón og án nokkurs vafa er þetta mesti vilji sem ég hef séð hjá laxi að taka flugu á mínum ferli sem veiðimaður og hef ég nú orðið vitni að hinu og þessu," sagði Grétar Þorgeirsson í samtali við Krafla.is

Jóhann Gunnar Arnarsson með 82 cm lax sem tók bláa Kröflu á dögunum í Straumunum.

Einn fjölmargra veiðimanna sem reynt hefur Kröfluflugur í sumar er Hörður Vilberg, mikill fluguveiðimaður og stjórnarmaður í Stangaveiðifélagi Reykjavíkur. Hörður hefur í sumar fengið að reyna að Kröfluflugurnar vekja áhuga laxa hvar sem þær fara. Iða, Kolskeggur og blá Krafla hafa komið við sögu hjá honum og veiðifélaga hans það sem af er sumri eins og lesa má um hér.

,,Ég var í opnunarhollinu í Norðurá og náði þar að espa fisk upp á Stokkhylsbrotinu til að elta Kolskegg.  Ég var á leið heim að kvöldi, hálfnaður upp himnastigann frá hylnum, þegar ég ákvað að doka við og horfa yfir veiðistaðinn. Þá sá ég lax stökkva og ákvað að  hlaupa niður aftur og reyna Kolskegg á flotlínu þó svo að lofthitinn væri að detta niður í þrjár gráður, sólin að setjast og vatnshitinn væri á svipuðum slóðum. Í öðru kasti kom lax á eftir flugunni í þrígang, þvílíkur öldugangur! Hann rétt glefsaði í fluguna í þriðja skiptið og eftir stóð ég nötrandi en þvílík sjón. Þetta er mér afar minnisstætt," segir Hörður.

Hann átti síðan leið í Straumana á dögunum og sá þá að 2 af fyrstu 8 löxunum í Straumunum höfðu komið á Iðu. ,,Ég reyndi hana efst í Straumunum, hálf-tommu keilu, og hún var ekki búin að vera lengi útí þegar ég sett í stærðar lax. Ég tosaðist á við hann í 10 mínútur. En hann tók grannt og eftir þrjár rokur lak hann af. Stuttu áður hafði félagi minn Jóhann Gunnar Arnarsson sett í og landað á sama stað  82 cm laxi á Bláa Kröflu. Fiskinum var að sjálfsögðu sleppt en tökustaðinn var út af svokölluðum Silungagarði," sagði Hörður Vilberg og var ánægður með frammistöðu Kröfluflugnanna. ,,Ég á eftir að reyna Kröfluflugurnar betur í sumar og ég er þess full viss að næsta fiski sem fellur fyrir þeim verður landað," sagði Hörður.

Jóhann Gunnar Arnarsson togast á við laxinn í Straumunum. Laxinn tók bláa Kröflu en hún hefur oft reynst veiðimönnum vel sem hana reyna.

Mynd frá Langá í fyrra. Veiðimaðurinn heitir Hrefna og laxinn tók Kolskegg.

,,Það hefur verið heldur rólegt yfir Langá undanfarna daga en hollið sem ég var í fékk nálægt 25 löxum. Það verður að teljast viðunandi miðað við laxamagnið sem var í ánni. Af þessum löxum sem hollið fékk voru 20 á Kröfluflugur og flestir fiskarnir komu á Kolskegg," sagði leiðsögumaður við Langá í samtali við Krafla.is

Flugurnar okkar eru að gera það gott og Langá ein af mörgum þar sem fréttir berast af góðri veiði á okkar flugur. Veiði er mun lakari í Langá núna miðað við sama tíma undanfarin ár eins og í mörgum ám. Nýjar fréttir frá Norðurá gefa þó fyrirheit um að betri tímar séu í vændum og veiðimenn við Langá eiga örugglega eftir að lenda í mörgum ævintýrum í sumar.

Við minnum á að Kolskegg í mörgum útfærslum fá veiðimenn aðeins í Veiðibúðinni Krafla í Höfðabakka 3.

Hafsteinn Orri Yngvason með lax úr Langá sem tók Kolskegg. Myndin er ekki ný.

Róbert Rúnarsson með glæsilegan fisk úr Miðfjarðará sem tók Kolskegg.

Okkur berast stöðugt magnaðar fréttir af Kröfluflugunni Kolskeggi sem hefur verið að gera það gott í veiðinni það sem af er sumri. Til okkar kemur mikill fjöldi veiðimanna í Veiðibúðina Kröflu og segir farir sínar ekki sléttar þegar Kröfluflugurnar eru annars vegar.

Félagar í veiðifélaginu Óðfluga voru nýverið við veiðar í Miðfjarðará fyrir austan. ,,Þetta var frábær veiðitúr. Við náðum 14 löxum á land en þegar við komum var áin mjög vatnsmikil og erfið viðureignar. Þetta batnaði fljótt og við urðum fljótlega vel varir. Alls náðum við 14 löxum á land. 11 þeirra tóku Kolskegg en 3 Sunray Shadow. Kolskeggurinn var ótrúlegur og þessi fluga er hreinlega ekki hægt. Það var með hreinum ólíkindum að sjá hvernig laxinn rauk á Kolskegginn og þetta er fluga númer eitt hjá okkur í dag," sagði Róbert Rúnarsson í samtali við Krafla.is þegar þeir félagar voru ,,komnir til byggða."

,,Ég hef aldrei áður séð öflugri flugu. Við vorum að fara yfir með öðrum flugum líka en alltaf þegar kom að Kolskeggi þá tók laxinn. Þetta var engin tilviljun og það var alls ekki sama hvaða fluga var í vatninu. Það varð að vera Kolskeggur til að eitthvað gerðist," sagði Róbert ennfremur en þeir félagar misstu mjög marga laxa á Kolskegginn í túrnum. ,,Við vorum að veiða á allar útgáfur af Kolskeggnum, vorum með léttar túpur og þungar og allar stærðir," sagði Róbert

Við viljum ítreka að Kolskeggur fæst einungis í Veiðibúðinni Kröflu, Höfðabakka 3. Ennfremur viljum við láta veiðimenn vita af lélegum eftirlíkingum sem eru til sölu í öðrum veiðibúðum. ,,Það skiptir auðvitað máli hvaðan flugurnar eru. Við kaupum okkar flugur í Veiðibúðinni Kröflu og þær hafa reynst okkur frábærlega vel, eru sterkar og mjög veiðnar," sagði Róbert Rúnarsson.

Óttar með flottan lax sem tók Kolskegg í Miðfjarðará.

Svanþór Laxdal með einn af 11 löxunum sem náðust á land í Miðfjarðará.