Hljóp á milli manna og ,,reddaði" 5 löxum í lokin

Fallegur smálax á bakkanum við Hítará. Laxinn tók svarta Kröflu.

,,Þetta var skemmtilegt þarna í lokin. Það var búið að vera frekar rólegt og langmest af fiski á neðsta svæðinu við veiðihúsið. Síðasta morguninn var ákveðið að skipta neðsta svæðinu jafnt milli manna og síðasta klukkutímann eða svo voru tvær stangir á neðsta svæðinu. Sá klukkutími var mjög skemmtilegur hjá þessum veiðimönnum," sagði heimildamaður okkar sem var við veiðar í Hítará fyrir nokkru.

Erlendu veiðimennirnir sem hér um ræðir voru með sínar eigin flugur. Aðkomumaður lumaði hins vegar á Kolskegg í sínum fórum og að sjálfsögðu frá Veiðibúðinni Kröflu. Eftir að hafa hnýtt Kolskegginn á taumendann hjá öðrum þeirra greip hana lax í fyrsta kasti með miklum látum eins og venjulega. Þá þegar tók aðstoðarmaðurinn til fótanna til félaga síns í næsta hyl fyrir neðan og sama sagan endurtók sig þar. Kolskeggurinn hnýttur á taumendann og fallegum lúsugum laxi landað skömmu síðar. Þegar upp var staðið voru félagarnir búnir að fá 5 laxa á Kolskegginn og það voru ánægðir veiðimenn sem kvöddu Hítará þennan daginn og ekki í fyrsta skipti sem Kolskeggur bjargar veiðitúrum hjá veiðimönnum. Um það gætum við nú orðið skrifað margar greinar en látum þessa nægja í bili.