Fréttir

Forsíða nýja Sportveiðiblaðsins sem er stútfullt af skemmtilegu efni.

Sportveiðiblaðið í ritstjórn Gunnars Benders, er nýkomið út og er blaðið mjög glæsilegt í alla staði. Blaðið er 116 síður og hreinlega hlaðið skemmtilegu efni um stangaveiði og skotveiði.

Pálmi Gunnarsson er í ítarlegu viðtali Ragnars Hólm og fara þeir félagar vítt yfir völlinn. Rætt er við Eddu Guðmundsdóttur fyrrum forsætisráðherrafrú og eiginkonu Steingríms Hermannssonar. Viðtal er við Gísla Ásgeirsson um nýja markaðssetningu Íslands. Bubbi Mothens segir frá ofurlaxinum á Núpafossbrún. Bjarni Júlíusson, fyrrum formaður SVFR fjallar um netamálin í Hvítá og Ölfusá. Árni Magnússon fyrrverandi ráðherra segir afar skemmtilega veiðisögu frá Grænlandi. Eirikur St. Eiríksson, stjórnarmaður í SVFR, segir frá fyrsta veiðidegi ársins í Tungufljóti og loks má nefna mjög ítarlega kynningu á Laxá í Leirársveit í máli og myndum. Hér er aðeins fátt eitt nefnt. Blaðið er hreinlega stútfullt af skemmtilegu efni.

Sportveiðiblaðið er afar glæsilegt tímarit og ætti hver einasti veiðimaður að gerast áskrifandi að blaðinu sem kemur út tvisvar á ári.

Hörður Hafsteinsson með fallegan 96 cm hæng á Iðu sem tók Randalín túpu sem fæst eingöngu á Krafla.is Mjög sterk fluga sem skilar alltaf góðri veiði við Iðu og víðar.

Deilan um netaveiði á laxi í Hvítá í Árnessýslu og Ölfusá er í eins miklum hnút og hún getur verið. Þrátt fyrir mikinn árangur Stangaveiðifélags Reykjavíkur við uppkaup á netalögnum hefur syrt í álinn undanfarið. Árið 2007 veiddust rúmlega 400 laxar í net á umræddu svæði. Í kjölfar kaupa SVFR á netalögnum veiddust í fyrra um 3100 laxar í net á þessu svæði. Þessar tölur komu mjög á óvart og voru í raun sem kjaftshögg framan í stangaveiðimenn. Í ljós kom að netaveiðimenn sem ekki var búið að semja við höfðu sett allt í botn, nýtt sér ástandið til hins ýtrasta og aukið verulega við veiðiskapinn.

Staðan í dag er mjög erfið. Stangaveiðifélag Reykjavíkur virðist vera eini aðilinn sem hefur einhvern áhuga á málinu. Veiðifélag Árnesinga gerir ekki neitt. Félagið er þó líkast til eini aðilinn sem getur leyst þessi netamál á mjög skömmum tíma á þann hátt sem allir geta sætt sig við. Einfaldlega með því að beita félaga sína sem stunda netaveiðar sömu aðferðum og kvöðum og þá meðlimi félagsins sem stunda stangaveiðina. Stangaveiðimönnum eru settar verulegar skorður. Þeir eiga á einni veiðislóð að sleppa öllum laxi, öllum vænum laxi á annarri og á mörgum stöðum gangast stangaveiðimenn undir kvótareglur. Í Stóru Laxá hefur veiðitími verið styttur verulega. Netaveiðimenn fá hins vegar að stunda sínar veiðar óáreittir. Valsa um veiðisvæðið með tæki sín og trossur með græðgina eina við stjórnvölinn. Þeir verða einungis að virða landslög en að öðru leyti geta þeir hagað sér að vild. Á síðasta sumri hafa þessir menn farið hamförum og sýnt af sér ótrúlegt siðleysi með gengdarlausum netaveiðum sem námu sumaraflanum í Norðurá. Svo halda sumir spekingar að netaveiðar á Hvítársvæðinu hafi engin áhrif. Halda menn virkilega að það skipti engu máli að úr Hvítá og Ölfusá sé tekinn afli sem nemur allri veiði í Norðurá í Borgarfirði í heilt sumar??

Fallegur nýgenginn 6 punda lax sem tók Kröflu orange á Landaklöppinni við Syðri Brú í Soginu sl. sumar.

Auðvitað á Veiðifélag Árnesinga strax að setja netaveiðimönnum reglur fyrir sumarið. Leyfa enga netaveiði fyr en um miðjan júlí og leyfa aðeins netaveiði í 30-40 daga. Þessi ákvörðun myndi líklegast mælast vel fyrir hjá stangaveiðimönnum. Best kæmi hún sér þó likast til fyrir bergvatnsárnar á vatnasvæðinu, Sogið og Stóru Laxá svo einhverjar séu nefndar. Með því að leyfa netaveiðarnar frá miðjum júlí væri obbanum af eftirsóttasta hrygningarfiskinum á vatnasvæðinu líkast til hlíft og bjargað. Til dæmis öllum stærsta laxinum sem strunsar án afláts á hrygningarstöðvar sínar ofan við fjórða veiðisvæðið í Stóru Laxá, langt fram á hálendinu.

Ef Veiðifélag Árnesinga kýs að aðhafast ekkert í málinu er ljóst að stangaveiði verður brátt svipur hjá sjón á vatnasvæði Hvítár og Ölfusár. Veiðimenn, sem margir hverjir hafa haldið áratuga langri tryggð við svæðið, munu þá láta sig hverfa og leita á önnur og skynsamlegri mið. Þá verður of seint fyrir netabændur með dollaramerki í augum að koma fram og monta sig af svona og svona mikilli veiði í mörg ár og krefjast hárra upphæða fyrir netaveiðina. Þá hafa einfaldlega engin félög veiðimanna löngun lengur til að tala við netabændur.

Netabændur hafa með framferði sínu í fyrra sýnt mikið siðleysi, í besta falli algjört ábyrgðarleysi. Við skulum hafa hugfast að þeir eru með lögin sín megin og veiðiréttur þeirra er lögvarinn. Stangaveiðibændur, bændur sem leggja ekki net heldur leigja veiðirétt sinn til stangaveiði, eru með hjartað á réttum stað og mælast til þess, eða vona að minnsta kosti, að netabændur hafi til að bera sömu ábyrgðartilfinningu og sómatilfinningu og aðrir veiðimenn. Hafi í raun áhuga á því að umgangast sína auðlind af sömu varkárni og umhyggju og stangaveiðibændur. En því miður er því ekki að heilsa. Framferði netabænda sl. sumar sýnir að þeir eru í raun mestir óvinir vatnasvæðisins og hika ekki við að beita öllum ráðum til að stinga félaga sína í Veiðifélagi Árnesinga í bakið.

Langholt. Fallegt og vinsælt veiðisvæði í Hvítá.

Vatnasvæði Hvítár og Ölfusár á sér marga óvini. Sumir þeirra eru ekki betur gefnir en svo að þeir monta sig á almannafæri af lögbrotum sínum sem þeir stunda óhindrað og óáreittir. Fyrir tveimur árum var ég á leið austur fyrir fjall til laxveiða. Ég ákvað að stoppa við Ölfusá við litla veiðihúsið neðan við brúna yfir Ölfusá. Skömmu síðar bar þar að á rándýrum jeppanum sínum karlmann á miðjum aldri. Sá gaf sig á til við mig og tjáði mér strax að svakaleg ganga væri í Ölfusána. Ég spurði um rök fyrir þeirri fullyrðingu og fékk þau umbúða- og svikalaust. Maðurinn sem sagðist vera múrari og með sumarhús sitt í landi Öndverðarness, í næsta nágrenni Ölfusár, lýsti því fyrir mér í smáatriðum hvernig hann fyllti bát sinn aftur og aftur af lúsugum laxi. Hann sagðist vera með sæmilega langt net og það væri reglan að þegar hann væri búinn að tæma netin og fylla bátinn og kominn í land, þá væri netið orðið fullt á ný.  Mest kom mér á óvart hve múrarinn var sperrtur yfir þessum afrekum sínum. Ég var auðvitað auli að taka ekki niður bílnúmer veiðiþjófarins og kæra í kjölfarið. Hversu margir veiðiþjófar af þessari tegundinni eru til?

Stangaveiðimenn sem vilja vatnasvæði Hvítár vel eiga aðeins einn kost í stöðunni í dag. Beita Veiðifélagi Árnesinga eins miklum þrýstingi og frekast er unnt. Veiðimenn þurfa að taka sig saman, senda félaginu tölvupósta og hringja án afláts og láta skoðanir sínar í ljósi. Veiðifélagið verður að setja ákveðnar skorður við netaveiðum félagsmanna sinna í fullu samræmi við þær skoruður sem stangaveiðimenn verða að lifa við. Þetta er eina færa leiðin til að leysa þetta stóra mál og leysa það strax.

Stefán Kristjánsson

Hann er á í Minnivallalæk 20. apríl sl.

,,Það hefur gengið frekar treglega í Minnivallalæk í apríl fyrir utan að eitt holl fékk 12 fiska, annars hefur þetta verið dræmt flesta daga, og oft verið kalt þarna uppfrá. En Karl Olsen og félagar hittu aldeilis vel á hann í tveggja daga holli sem lauk veiði á hádegi í dag. Fengu þeir 24 fiska og víða um á, stærstu tæplega 80 cm langa eða allt að 10 pundum, og margir á bilinu 5-7 pund! Virtist í kjölfar mikillar rigningar þar sem lofthitinn rauk upp í 12 C hafa komið mikil hreyfing á urriðann. Um tíma "kraumaði" öll Húsabreiðan og höfðu veiðimenn aldrei séð annað annað eins "show" í veiði áður að þeirra sögn, en greinilegt var að mikið af rykmýi var að klekkjast þá út þar og fiskurinn óður í fluguna. Frábært að loks sé allt komið af stað í læknum og hvað fiskurinn er dreifður, ekki áberandi mikið í Stöðvarhyl heldur víða um Minnivallalæk sem þeir voru að fá hann, segir í fréttatilkynningu frá Þresti Elliðasyni hjá Strengjum.

,,Næst verður opnað á okkar svæðum í Breiðdalsá 1. maí á silungasvæðinu þar og bleikjan er mætt í ósinn! Sáust þær vaka á laugardag er maður átti leið um svæðið og tók hann víst myndir af því til sönnunar svo ekki fer á milli mála með það.  Töluverður snjór er fyrir austan í fjöllum og lítur vel út með vatnsbúskap í Breiðdal fyrir sumarið.
Nokkuð er laust af leyfum ennþá hér og þar í okkar ám, en mikið er spurt um lausa daga nú þegar vorfiðringur er komin í veiðimenn og má búast við að það töluvert verði bókað á næstu dögum og vikum svo ég hvet menn til að hafa samband frekar fyrr en seinna ef óskað er eftir veiðileyfum," segir ennfremur í tilkynningunni frá Strengjum.

Bleikjurnar á Grænlandi voru brjálaðar í Beyki. Þessar tóku Beyki nr. 12.

Nú styttist óðum í að veiðimenn fari á stjá með stengur sínar. Lengi höfum við hér á Krafla.is verið litlir stuðningsmenn vorveiði sem hefst 1. apríl. Veiði á niðurgöngufiski er fyrirbrigði sem maður hefur lengi átt erfitt með að skilja. Þó er hægt að skilja þetta að einhverju leyti ef menn sleppa hverjum einasta fiski sem þeir veiða. Skiljum við ekki tilganginn í því að drepa og hirða niðurgöngufisk í tugatali. Skorum við á veiðimenn sem á annað borð fara í vorveiði að sleppa öllum fiski.

Veiðimenn velta því mjög fyrir sér þessa dagana hvernig sala laxveiðileyfa gangi fyrir komandi sumar. Ber mönnum ekki saman um stöðuna. Margir veiðileyfasalar sem við höfum heyrt af segja söluna hafa verið mjög góða og lítið sé eftir af lausum dögum í sumar. Veiðimenn sem við höfum heyrt í segjast kannast við þessa stöðu. ,,Það er líklegt að búið sé að bóka töluvert af dögum í flestum ánum. Samkvæmt mínum heimildum eiga veiðimenn hins vegar í mörgum tilfellum eftir að greiða fyrir þessi veiðileyfi og þá munu leigutakar standa frammi fyrir miklum vandamálum. Ég held að þegar júní rennur upp verði margir dagar óseldir og þá verði hægt að ná sér í dag eða daga fyrir ótrúlega lítinn pening," sagði viðmælandi okkar. Innan skamms ætti að koma í ljós hvert veiðimaðurinn hefur rétt fyrir sér.

Veiðimenn sem hafa áhuga á stangaveiði á Grænlandi ættu að leggja leið sína í verslunina Ellingsen í dag, laugardag. Þar verður í gangi öflug kynning á veiðisvæðum í þessu magnaða landi en það er Flugfélag Íslands sem sér um söluna. Á Grænlandi er mögnuð bleikjuveiði og þar hafa okkar flugur oftar en ekki komið við sögu. Höfum við heyrt fjölmargar sögur af silungaflugum okkar, Króknum, Mýslu, Beyki og Beyglu (nr. 12-16)  og eins hafa Kröflurnar í ýmsum útgáfum reynst afar vel í grænlenskum ám og vötnum. Er okkur þá sérstaklega minnisstæð frásögn Hjálmars Árnasonar, fyrrverandi alþingismanns, hér á Krafla.is sem lagði leið sína til Grænlands fyrir tveimur árum. Hafði þessi þekkti aðdáandi bresku flugunnar Frances reynt marga liti af Frances án árangurs er hann hnýtti Kröfluna á taumendann og við tók linnulítil löndun. Var væn bleikja á í hverju kasti.

Veiðisýningin sem vera átti í Perlunni í byrjun maí hefur verið blásin af. Ólafur M. Jóhannesson, forsprakki sýningarinnar, segir það mikil vonbrigði að ekki verði af sýningunni. ,,Við vorum vongóðir lengi vel og um tíma leit út fyrir að þetta gæti orðið hin glæsilegasta sýning. Þegar leið á fóru fyrirtæki hins vegar að afboða sig hvert af öðru og báru fyrir sig kreppunni og óvissu hvað framtíðina varðar. Fljótlega var þá ljóst að grundvöllur fyrir sýningunni var ekki lengur fyrir hendi og því það eina rétta að hætta við sýninguna," sagði Ólafur. Samkvæmt okkar heimildum verður stefnt að sýningu að ári. Veiðisýningin var síðast í Smáralind og þótti takast frábærlega í alla staði og sóttu um 6000 veiðimenn sýninguna.

Eftir rúman klukkutíma síðasta morguninn í Norðlingafljóti í veiðistað nr. 35 höfðu þessir sex laxar tekið svarta Kröflu keilutúpu 1/2".

30% hækkun í Norðlingafljóti. Veiðimenn eru mikið að velta fyrir sér verði á veiðileyfum næsta sumar. Í mjög mörgum tilfellum mun verðið lækka, hækka örlítið eða haldast óbreytt. Það er þess vegna skrítin þróun og í litlu samræmi við gang mála í flestum ám að leigutaki Norðlingafljóts tók upp á því að hækka verð á veiðileyfum frá því í fyrra um 30%. Nei, þetta er ekki prentvilla, 30%. Við hér á Krafla.is vorum í Norðlingafljóti sl. sumar, ekki á besta tíma en dagurinn kostaði engu að síður 50 þúsund. Er þar um strípað verð að ræða því ekkert er innifalið, sólarhringsgjald fyrir veiðihúsið var 4000 krónur og þá eftir að borga mat og annan kost. Í sumar eru þessir dagar á 65 þúsund. Vissulega er Norðlingafljót stórbrotin laxveiðiá, býður upp á marga skemmtilega veiðistaði og alltaf nægilegt vatnsmagn. Við veiddum 70 laxa í fyrra, nær alla á Kröflur og sönnuðu Kröflurnar enn einu sinni hversu öflugar þær eru. Ekki verður af veiðitúr okkar í sumar. Einfalt mál. Við látum ekki bjóða okkur 30% hækkun á milli ára.