22 punda hængur á Iðu keilutúpu í Breiðdalsá - stærsti fiskur sumarsins til þessa

Borgar Antonsson heldur hér á 22 punda laxinum úr Réttarhyl í Breiðdalsá sem tók þyngda Iðu keilutúpu frá Veiðibúðinni Kröflu skömmu fyrir hádegi í dag. Þetta er stærsti lax sumarsins til þessa.

Enn eru Kröfluflugurnar að slá í gegn í laxveiðinni og enn og aftur í Breiðdalsá. Skömmu fyrir hádegi í dag kom 22 punda lúsugur hængur á land úr Réttarhyl og tók hann þunga Iðu keilutúpu 1". Þetta er þriðji stórfiskurinn á tveimur dögum sem kemur á land á ársvæðum Þrastar Elliðasonar fyrir austan. Hinir voru 20 punda fiskur sem tók Kröflu orange kopartúpu í Breiðdalsá og á Jöklusvæðinu kom 19 punda hrygna á Kolskegg keilutúpu í gær.

Við vorum að fá skilaboð frá Borgari Antonssyni, leiðsögumani við Breiðdalsá. Þar segir hann: ,,Hér eru myndir af 3 síðustu fiskunum hjá mér í Breiðdalnum sem allir hafa tekið flugur frá Veiðibúðinni Kröflu.

Þann fyrsta, 98cm hæng, tók ég sjálfur ofan af ca 12 metra háum klettum í gljúfrinu á tommu orange Kröflu með því að kasta ,,upstream" þar sem hann lá djúpt. Viðureignin tók 10 mínútur.

Og hér er breski veiðimaðurinn með 22 punda laxinn sem var meter á lengd og 50 cm í ummál.

Næsti fiskur, 100 cm og vigtaður 11 kíló, 22 pund, tók erlendur veiðimaður á tommu Iðu keilutúpu í Réttarhylnum í morgun og tók sú barátta 15 mínútur og eftir því sem ég veit best er þetta stærsti fiskur sumarsins enn sem komið er.

Þá var haldið í Gljúfrahyl og aftur sett undir orange Kraflan og kastað vel upstream og skilaði það 82 cm fiski, 12 pund, sem tók um 10 mínútur að landa.

Ég þakka kærlega fyrir að hafa kynnst Kröfluflugunum og get staðfest að þær virka og verða mikið notaðar hér eftir. Það er eins og fylgi þessum flugum stórfiskar."

Þessi mynd er frá Breiðdalsá í morgun. Borgar Antonsson með 12 punda lax sem tók Kröflu orange 1" kopartúpu í Gljúfrahyl.