Síðasta holl með 6 laxa í Hítará - helmingur á Kröfluflugur

Steinar Petersen með fyrsta lax sumarsins úr Langadrætti í Hítará þetta sumarið. Laxinn tók 1/4" rauða Kröflu keilutúpu.

Hítará á Mýrum hafði á hádegi í dag gefið 20 laxa og er það álíka veiði og á sama tíma í fyrra. Aðstæður allar eru þó mun erfiðari nú en vatn er nálægt því að vera feti hærra í ánni í dag og á sama tíma í fyrra. Gerir það allar tilraunir veiðimanna erfiðari en ella væri.

Fjórða holl sumarsins lauk veiði á hádegi í dag, föstudag, og náði 6 löxum. Smálaxinn virðist vera að mæta en aðeins einn af þessum 6 löxum var tveggja ára lax. Eins árs fiskarnir 5 voru vel haldnir, 5-7 pund og flestir lúsugir. Laxinn tók reyndar mjög grannt og misstu veiðimenn marga laxa eftir stuttar en snarpar viðureignir. Mætti líklega nefna til sögu 12-15 slík dæmi.

Brúarfoss í Hítará. Myndin er tekin í gær. Mikið vatn en laxinn fer létt með að ganga fossinn við þessar aðstæður.

Spekingar tengdir Hítará til margra ára hafa haldið á lofti efasemdum um að lax gengi Brúarfossinn við veiðihúsið í miklu vatni eins og er í Hítará í dag. Síðasta holl afsannaði allar slíkar vangaveltur og fullyrðingar. Steinar Petersen, reyndur og afar snjall fluguveiðimaður, landaði í gær fyrsta laxi sumarsins í hinum fræga veiðistað Langadrætti. Laxinn var 5 pund, ekki lúsugur og tók rauða Kröflu 1/4 keilutúpu. Þar með var öllum ljóst að lax gengur Brúarfossinn þó vatnið sé mjög mikið. Og þegar 5 punda smálax kemst fossinn er hann auðvelt verkefni fyrir stælta tveggja ára laxa. Var það reyndar skoðun allra veiðimanna er skipuðu umrætt 6 laxa holl í Hítará að umræddur Brúarfoss væri ekki alvarleg hindrun á vegi laxfiska.

Veiðimenn sem könnuðu efra svæði Hítarár í gær urðu varir við lax í Markafljóti sem er afar snotur veiðistaður skammt fyrir neðan Grettisbæli sem er ekki síðri veiðistaður. Lax tók í gær Kröflufluguna Kolskegg í Markafljóti en takan var grönn og dugði skammt. Í morgun kastaði Gunnar Örn Pétursson Kolskegg í Markafljótið og leið ekki á löngu þar til silfraður smálax ,,straujaði" Kolskegginn með miklum látum. Þetta var skrautleg taka og eftirminnileg að sögn Gunnars Arnars sem er flestum hnútum kunnugur þegar kemur að fluguveiði og afar snjall og reyndur veiðimaður.

Breiðin er einn þekktasti veiðistaður Hítarár. Hér má sjá hve mikið vatn var í Hítará í dag. Kjörvatn líklega feti lægra.

Ekki virðist vera mikið um lax á neðra svæði Hítarár en svo virðist sem nokkrir laxar gangi í ána á hverju flóði. Veiðimenn í síðasta holli urðu ekki varir við lax í Steinastreng. Reyndar afar erfitt að vaða út á heppilegan stað til að ná góðum köstum á hylinn. Túnstrengir, allir þrír, voru þaulreyndir án árangurs. Kverkin var lífleg annað veifið en langir líflausir kaflar inn á milli. Breiðin galt fyrir mikið vatn. Stöku fiskur var þó farinn að tolla þar undir lok veiðitímans þegar rennsli árinnar lækkaði örlítið en við aðstæður dagsins í dag heldur Breiðin varla laxi.