Monthly Archives: December 2012

Fluguveiðipakkinn glæsilegi frá Echo. Við bætum 6 Kröfluflugum við og þessi pakki kostar aðeins 28.900 krónur í Veiðibúðinni Kröflu, Höfðabkka 3 og á Krafla.is

Við vorum að fá til landsins í morgun nýja sendingu frá Echo en þar er meðal annars að finna nýja útfærslu af fluguveiðipakka frá Echo sem verið hefur mjög vinsæll hjá okkur og var nánast orðinn uppseldur hjá okkur.

Um er að ræða 9 feta Echo flugustöng fyrir línu 5, 6 eða 8, Echo fluguhjól, Echo flotlínu og 20 punda undirlínu, taum og hólk utan um stöngina og hjólið.

Og til að fullkomna pakkann höfum við bætt við hann 6 Kröfluflugum. Þetta allt getum við nú boðið á aðeins 28.900 krónur og höfum við hvergi séð sambærilegan fluguveiðipakka á betra eða svipuðu verði. Þetta er draumapakkinn fyrir fluguveiðimanninn og sannarlega afar glæsileg jólagjöf. Þetta er upplagður pakki fyrir byrjendur og eiginkonuna og einnig þá sem komnir eru vel á veg í fluguveiðinni. Við skorum á veiðimenn að skoða þennan möguleika og gera samanburð á verði og gæðum.

Lífstíðarábyrgð er á stönginni.

Þessi glæsilegi pakki er til sölu í Veiðibúðinni Kröflu, Höfðabakka 3 og hér á Krafla.is undir flipanum Stengur/hjól og flugustengur.

Glæsilegur jólapakki fyrir fluguveiðimanninn frá Kröflu þar sem í raun er aðeins greitt fyrir stöngina.

Við viljum vekja athygli veiðimanna á því að við vorum að setja inn margar nýjar vörur í netverslun okkar hér á Krafla.is - Þar ber fyrst að nefna margar nýjar stengur frá Echo og frábærar vöðlur og skó frá AQUAZ. Þessar vörur hafa verið í mikilli notkun hérlendis undanfarin ár og reynst afar vel.

Nú þegar líða tekur að jólum viljum við vekja athygli veiðimanna á því að við erum að bjóða upp á mikið úrval af ódýrum og góðum jólagjöfum fyrir veiðimenn og við erum með mörg frábær jólatilboð í Veiðibúðinni Kröflu, Höfðabakka 3. Þar bjóðum við upp á lang mesta úrval landsins af íslenskum flugum og röðum í falleg flugubox fyrir hvern og einn.

Hvergi í veiðibúðum á Íslandi er meira úrval af íslenskum flugum en hjá okkur í Kröflubúðinni og Kröfluflugurnar fást eingöngu hjá okkur. Við erum með fjölmargar útgáfur af fluguboxum þar sem hægt er að finna eitthvað við allra hæfi. Ódýrasta fluguboxið hjá okkur inniheldur fjórar gárutúpur og kostar aðeins  1500 krónur.

Ein vinsælasta jólagjöfin hjá okkur í Kröflubúðinni eru íslensku fluguboxin okkar úr birki og mahoný þar sem við gröfum nöfn veiðimanna á boxin. Hægt er að velja um alls konar innihald af flugum í boxin og verðið er mjög gott. Þetta er mjög persónuleg gjöf og hefur algjörlega slegið í gegn hjá okkur. Sjá nánar á Krafla.is og í Veiðibúðinni Kröflu þar sem er mesta úrvalið.

Við erum með ýmsar útgáfur af jólapökkum fyrir fluguveiðimenn. Þar má nefna tvær útfærslur af fluguveiðipökkum þar sem hægt er að fá fluguhjól, undirlínu, flugulínu, aukaspólu og sex Kröfluflugur ókeypis. Aðeins er greitt fyrir verðið á flugustönginni. Þetta er án efa ein bestu tilboðin á markaðnum í dag (sjá nánar hér á Krafla.is undir flipanum Stengur og hjól og svo flugustengur). Sérstaklega þegar það er haft í huga að  í jólapökkunum okkar er 9 feta Echo flugustöng sem er í góðum gæðaflokki, góð flotlína og undirlína frá Echo, mjög gott fluguhjól frá Echo og 6 Kröfluflugur í hæsta gæðaflokki. Við erum að bjóða þessa pakka með rúmlega 40% afslætti núna fyrir jólin.

Við skorum á veiðimenn að gera samanburð á verði og gæðum.

Árni Friðleifsson, varaformður SVFR, þreytir lax í Norðurá sem tók rauða Kröflu.

Norðurá í Borgarfirði er komin í útboð og frestur til að bjóða í ána rennur út þann 20. janúar eða eftir slétta viku. Eftir samtöl við fjölmarga aðila í stangveiðinni vorum við á því að tvö tilboð myndu berast í ána, annað frá Stangaveiðifélagi Reykjavíkur og hitt frá sömu aðilum og eru með Kjarrá og Þverá á leigu. Það fyrirtæki heitir Starir ehf. Ekkert er þó fast í hendi og vera kann að fleiri aðilar hafi áhuga á Norðurá eins og virðist hafa komið á daginn.

Forsvarsmenn fyrirtækja í laxveiðibransanum eins og Lax-á og Hreggnasa hafa lýst því yfir opinberlega að þeir hafi ekki áhuga. Allur þeirra tími fari í að rétta af skútuna eftir mikið tap sl. sumar. Þá hefur Þröstur Elliðason sagt það í viðtali við okkur að hann hafi alls ekki áhuga.

Stangaveiðifélag Reykjavíkur hefur verið með Norðurá á leigu í 66 ár. Ýmislegt hefur gengið á í þeim samskiptum í gegnum árin eins og gefur að skilja en heimildir okkar segja að sjaldan eða aldrei hafi verið minni kærleikar með SVFR og Veiðifélagi Norðurár en einmitt nú. Ekki vitum við hverju er um að kenna. Viðbrögð bænda í Borgarfirði tala sínu máli. Beiðni SVFR um lækkun á samningi frá í vor var kolfelld á félagsfundi í haust og aðeins sjö aðilar í félaginu voru andsnúnir því að setja Norðurá í útboð og vildu semja við SVFR.

Þrátt fyrir ört minnkandi veiði í Norðurá sl. sumar þegar rúmlega 900 laxar veiddust í ánni, en um 2300 sumarið 2011, svipað verð veiðileyfa og 20% hækkun á samningi milli ára, er þó nokkur sala í Norðurá næsta sumar og mörg bestu hollin eru þegar seld. Við vitum um marga veiðimenn sem ætla að tryggja sér leyfi í Norðurá næsta sumar ef það skildi gerast að einhver aðili annar en SVFR skildi fá ána á leigu. Þá búast menn við miklum hækkunum sumarið 2014 og eins gott að njóta Norðurár næsta sumar ef framundan eru mörg ár þar sem verðið verður ekki viðráðanlegt.

Hvað sem öllum vangaveltum líður þá verður afar fróðlegt að fylgjast með gangi mála við Norðurá næstu dagana og við munum segja nýjustu fréttirnar hér á Krafla.is um leið og þær berast okkur.

Grímur Jónsson.   Myndin er frá www.votnogveidi.is

Grímur Jónsson, járnsmiður og veiðimaður er látinn.

Vinátta okkar Gríms var frekar stutt en einlæg að sama skapi. Áratugum saman áttum við stopul og frekar stutt kynni en vissum þó alltaf hvor af öðrum.

Fyrir nokkrum árum fékk ég þá hugmynd að skreyta fluguborðið í verslun okkar í Veiðibúðinni Kröflu í Höfðabakkanum með alvöru Snældum. Ég vildi gera þetta í samráði við höfundinn og hönnuðinn. Því var símtal til Gríms rökrétt framhald. Leyfið var auðfengið og þetta símtal markaði upphafið að afar traustri vináttu okkar. Ég mat það strax mikils við Grím að hann skildi leyfa mér að selja Snælduna og hann mat það afar mikils við mig að ég hafði fyrir því að spyrja um leyfi. Komu afar sterk viðbrögð hans mér reyndar í opna skjöldu. Nánar mun ég fjalla um þessi samskipti okkar og afrakstur þeirra fljótlega hér á Krafla.is

Grímur Jónsson hannaði Snælduna árið 1984. Þessa miklu aflaflugu og var hún honum afar kær eins og nærri má geta. Grímur Jónsson vandi komur sínar í verslun mína síðustu æviár sín og ég varð þess heiðurs aðnjótandi að fá að gefa honum kaffi og eiga við hann afar skemmtilegar, fróðlegar og langar samræður á kaffistofunni. Oftar en ekki bar Snælduna á góma enda lék hún oft aðalhlutverkið í fengsælum veiðiferðum Gríms. Eins og fleiri veiðimenn af sömu kynslóð var Grímur óspar að miðla af áratuga reynslu sinni af veiðiskap. Hann var alltaf tilbúinn að leiðbeina mönnum og kenna á árbakkanum og þeir eru margir veiðimennirnir sem eiga honum margt að þakka þegar fluguveiðin er annars vegar.

Mér fannst það í raun og veru mikill heiður að svo mikill veiðimaður og örlagavaldur í íslenskri fluguveiði skyldi hafa á því áhuga að heimsækja mig reglulega í mína litlu og nýju veiðibúð og veita mér leyfi til að selja Snælduna. Báðir vorum við sérstaklega ánægðir með þetta vegna þess að þar með fékk Grímur vissa upphæð af hverri seldri Snældu í Kröflubúðinni.

Þegar við hittumst voru það afar sérstakar stundir og oft fyrir margra hluta sakir. Grímur var góður vinur föður míns og hann sagði mér margar góðar og skemmtilegar sögur af þeirra viðskiptum. Grímur notaði oft Kröfluna og sagði mér margar skemmtilegar veiðisögur þar sem Kröflur í ýmsum litum komu við sögu. Strax þótti mér vænt um Grím og fyrr en varði varð til hjá mér hvatning til að upphefja þennan hógværa veiðimann og frábæra fluguhönnuð. Ég var ákveðinn í því að gera veg hans sem mestan innan fluguveiðinnar og aðstoða hann á allan þann hátt sem mögulegt var.

Grímur eignaðist jörðina Hvalsá í Hrútafirði fyrir nokkrum áratugum en við þá undurfögru litlu bergvatnsá hafði ég notið uppeldis við veiðar með föður mínum, Kristjáni Gíslasyni, og þar veiddi ég minn fyrsta lax. Í Sandkvörninni skammt fyrir neðan Árbæjarfossinn. Faðir minn og félagar hans voru með Hvalsána á leigu um tíma áður en Grímur keypti jörðina. Löngum stundum rædum við Grímur um Hvalsána. Þótti mér afar vænt um þá miklu umhyggju sem hann sýndi ánni. Var það í góðum takti við þankagang föðurs míns og hans félaga við Hvalsá. Það voru ómetanlegar stundir sem við áttum saman á kaffistofunni þegar Hvalsá bar á góma. Við einhvern veginn tókumst báðir á flug. Áttum það sameiginlegt að umræðuefnið var okkur kærara en flest annað og væntumþykjan og virðingin var við öll völdin. Það var stórbrotið að heyra Grím lýsa því hvernig hann komst niður í gljúfrið ofarlega við Hvalsá á fjórhjólinu þegar fæturnir höfðu að mestu lokið sínu hlutverki. Eftir öll árin gat ég lýst aðstæðum með nokkuð nákvæmum hætti og við Grímur rötuðum saman veginn við ána og áhugi beggja var alveg ósnortinn.

Grímur Jónsson var góður maður. Hann var einn af þessum gömlu góðu snillingum í fluguveiðinni sem því miður fer fækkandi. Með honum er genginn kær vinur margra og minningarnar eru margar og allar góðar.

Ég votta aðstandendum hans samúð mína og bið þeim blessunar í framtíðinni.

Blessuð sé minning Gríms Jónssonar.

Stefán Kristjánsson