Fréttir - Krafla.is

Fallegur lax sem tók Iðu flottúpu frá Veiðibúðinni Kröflu í opnun Norðurár í fyrra.

Tilboð hafa verið opnuð í Norðurá í Borgarfirði og bárust þrjú tilboð í ána. Tvö tilboðanna komu frá Stangaveiðifélagi Reykjavíkur og eitt tilboð frá ónefndum aðila sem Gestur Jónsson lögmður skrifaði undir.

Hæsta tilboðið var frá sölufyrirtæki Stangaveiðifélags Reykjvíkur, SVFR ehf. og hljóðaði það upp á 83,5 milljónir. Stangaveiðifélag Reykjavíkur var með tilboð upp á 76,5 milljónir. Þriðja tilboðið var afar undarlegt. Þar voru reifaðar ýmsar hugmyndir varðandi framtíð Norðurár en engar tölur nefndar.

Við höfum heimildir fyrir því að þessi niðurstaða úr útboðinu hafi komið stjórn Veiðifélags Norðurár í opna skjöldu og valdið henni og fleiri landeigendum við Norðurá gríðarlegum vonbrigðum. Það virðist nefnilega staðreynd að margir landeigendur og fulltrúar í Veiðifélagi Norðurár geri sér enga grein fyrir stöðu veiðileyfamarkaðarins í dag.

Við höfðum samband við Bjarna Júlíusson, formann SVFR og spurðum hann út í stöðuna í dag:

,,Við vonumst svo sannarlega til að Veiðifélag Norðurár ræði við okkur í kjölfar útboðsins. Við vissum auðvitað ekki hvað kæmi upp úr umslögunum, en það er ljóst að aðrir veiðileyfasalar eiga greinilega nóg með sitt. Við teljum Norðurá félaginu ákaflega mikilvæga og gerðum eins gott tilboð og við treystum okkur til. Ákváðum einfaldlega að bjóða á okkar forsendum og ef einhverjir aðrir teldu sig geta gert betur, þá yrði bara að hafa það! En vonandi getum við sest fljótlega niður með Veiðifélagi Norðurár og rætt framhaldið. Við erum búin að eiga samstarf í nærri 67 ár og ég vil sjá það verða að minnsta kosti 100 ára," sagði Bjarni í samtali við Krafla.is

- Af hverju var Stangaveiðifélag Reykjvíkur að senda inn tvö tilboð í Norðurá?

,,Það er aðeins blæbrigðamunur á tilboðunum tveimur. Við stöndum að sjálfsögðu við bæði tilboðin en helsti munurinn á þeim er að þau taka mið af mismunandi útfærslu húsaskosts. En ég ítreka að bæði eru þau í takt við útboðsgögn og eru gild tilboð."

- Nú er stjórn Veiðifélags Norðurár að hugsa næsta leik í stöðunni? Hvað mun gerast næst?

,,Ég trúi því ekki að þeir byrji á að tala við manninn með ógilda tilboðið!  Það væri andstætt öllum leikreglum. Þeir eiga kost á að hafna öllum tilboðum, en það finnst mér langsótt. Eðlilegar leikreglur eru á þann veg að þeir ræði fyrst við aðilann sem var með besta tilboðið," sagði Bjarni Júlíusson.

Þessi staða sem komin er upp við Norðurá er merkileg fyrir margra hluta sakir. Það að enginn veiðileyfasali nema SVFR sendi inn tilboð í Norðurá endurspeglar stöðuna á veiðileyfamarkaðnum í dag. Rétt er að hrósa stjórn SVFR fyrir framgöngu hennar í útboðsmálunum. Félagið hélt sig við skynsamlegar og raunhæfar tölur og nú hefur það gerst að tölurnar í tilboðum SVFR í Norðurá hafa nú þegar sett ný viðmið á markaðnum og gefið tóninn. Ljóst er að leiguupphæðir í samningum sem gerðir verða vegna margra annarra áa á næstu misserum og árum munu lækka stórlega.

Við fylgjumst áfram með framvindu mála og flytjum ykkur nýjar fréttir um leið og þær berast okkur.

Hvíta Echo stöngin í keng á Eyrinni í Norðurá í fyrra og laxinn kom á land skömmu síðar.

Norðurá í Borgarfirði er í útboði og frestur til að bjóða í ána rennur út þann 20. janúar eða eftir slétta viku. Eftir samtöl við fjölmarga aðila í stangveiðinni vorum við á því að tvö tilboð myndu berast í ána, annað frá Stangaveiðifélagi Reykjavíkur og hitt frá sömu aðilum og eru með Kjarrá og Þverá á leigu. Það fyrirtæki heitir Starir ehf. Ekkert er þó fast í hendi og vera kann að fleiri aðilar hafi áhuga á Norðurá eins og virðist hafa komið á daginn.

Forsvarsmenn fyrirtækja í laxveiðibransanum eins og Lax-á og Hreggnasa hafa lýst því yfir opinberlega að þeir hafi ekki áhuga. Allur þeirra tími fari í að rétta af skútuna eftir mikið tap sl. sumar. Þá hefur Þröstur Elliðason sagt það í viðtali við okkur að hann hafi alls ekki áhuga.

Stangaveiðifélag Reykjavíkur hefur verið með Norðurá á leigu í 66 ár. Ýmislegt hefur gengið á í þeim samskiptum í gegnum árin eins og gefur að skilja en heimildir okkar segja að sjaldan eða aldrei hafi verið minni kærleikar með SVFR og Veiðifélagi Norðurár en einmitt nú. Ekki vitum við hverju er um að kenna. Viðbrögð bænda í Borgarfirði tala sínu máli. Beiðni SVFR um lækkun á samningi frá í vor var kolfelld á félagsfundi í haust og aðeins sjö aðilar í félaginu voru andsnúnir því að setja Norðurá í útboð og vildu semja við SVFR.

Við höfum heimildir fyrir því að fjórir aðilar hafi nú þegar sótt útboðsgögn en þarf ekki endilega að þýða að fjögur tilboð berist eða hafi borist í ána. Þá segja okkar heimildir einnig að eitt tilboð sem hefur borist sé yfir 100 milljónir króna og tvö önnur tilboð hafi borist sem séu með ,,erlent fjármagn" á bak við sig.

Þrátt fyrir ört minnkandi veiði í Norðurá sl. sumar þegar rúmlega 900 laxar veiddust í ánni, en um 2300 sumarið 2011, svipað verð veiðileyfa og 20% hækkun á samningi milli ára, er þó nokkur sala í Norðurá næsta sumar og mörg bestu hollin eru þegar seld. Við vitum um marga veiðimenn sem ætla að tryggja sér leyfi í Norðurá næsta sumar ef það skildi gerast að einhver aðili annar en SVFR skildi fá ána á leigu. Þá búast menn við miklum hækkunum sumarið 2014 og eins gott að njóta Norðurár næsta sumar ef framundan eru mörg ár þar sem verðið verður ekki viðráðanlegt.

Hvað sem öllum vangaveltum líður þá verður afar fróðlegt að fylgjast með gangi mála við Norðurá næstu dagana og við munum segja nýjustu fréttirnar hér á Krafla.is um leið og þær berast okkur.

Við hjá Krafla.is og Veiðibúðinni Kröflu sendum viðskiptavinum okkar öllum, félögum í Kröfluklúbbnum og öðrum velunnurum innilegar óskir um gleðileg jól og farsæld á nýju ári.

Kærar þakkir fyrir viðskiptin á árinu sem senn er liðið og frábærar móttökur.

Stefán og Sólveig

Kröflujólatréð í Kröflubúðinni Höfðabakka 3. Hvað eru margar Kröflutúpur á trénu?

Við erum búin að skreyta litla Kröflujólatréð okkar í Veiðibúðinni Kröflu Höfðabakka 3 og viðskiptavinir okkar eru þegar farnir að giska á hve margar Kröflutúpur eru á trénu.

Eftir jólin drögum við síðan út nafn heppins viðskiptavinar og sá hinn sami fær í verðlaun glæsilegt flugubox úr viði með glæsilegum Kröfluflugum.

Við erum með opið til kl. 18 í dag og við hvetjum veiðimenn til að mæta til okkar, kíkja á glæsileg jólatilboð okkar og taka þátt í getrauninni og telja kröflurnar á jólatrénu.