Fréttir - Krafla.is

Rennt fyrir fisk á fallegum veiðistað ofarlega í Djúpadalsá.

Við á Krafla.is viljum vekja áhuga fluguveiðimanna á þeirri staðreynd að lausir eru nokkrir dagar í Djúpadalsá í Reykhólahreppi og eru þessir lausu dagar á mjög góðum tíma.

Í fyrra veiddust 660 bleikjur í Djúpadalsá og 35 laxar. Allar upplýsingar um ána er að finna hér á Krafla.is undir Djúpadalsá. Þessa dagana erum við að raða veiðimönnum niður á sumarið en i sumar verður í fyrsta skipti einungis leyfilegt að veiða á flugu í Djúpadalsá.

Djúpadalsá er gullfalleg í alla staði og ert tilvalin fyrir fjölskyldur þar serm auðvelt er að kenna nýliðum í fluguveiði réttu handtökin. Allir fá fisk og öll aðstða er mjög góð og meðal annars hafa veiðimenn aðgang að mjög góðri innisundlaug í stuttu gönufæri frá veiðihúsi.

Allar upplýsingar ásamt fjölda mynda eru hér á Krafla.is og þeir sem hafa áhuga á lausum dögum geta haft samband við okkur á sk@krafla eða í síma 698-2844.

Lára Kristjánsdóttir að gefa 80 cm hrygnu líf, sem hún veiddi á Kolskegg flottúpu kl. 8:20 í morgun í Myrkhyl. Ljósm. Þorsteinn Ólafs.

Í morgun höfðum við spurnir af því að þrír laxar til viðbótar hefðu veiðst í Norðurá. Það voru hjónin Þorsteinn Ólafs og Lára Kristjánsdóttir sem veiddu laxana í Myrkhyl og Myrkhylsrennum og allir tóku þeir flottúpuna Kolskegg long wing. Opnunarhollið er því búið að fá 8 laxa og 5 af þeim veiddust á Kolskegg. Að auki vitum við af tveimur löxum til viðbótar sem tóku Kolskegg og Kröflu orange en þeir náðust ekki á land.

Við eigum von á fleiri myndum og birtum þær þegar þær berast okkur.

Gunnar Örn Pétursson með þrjá laxa sem hann fékk í Norðurá fyrir þremur árum. Gunnar Örn setti í 3 laxa í Stekknum á Munaðarnessvæðinu í gær en missti þá alla. Tveir þeirra tóku Kolskegg flottúpðu og sá þriðji Kröflu orange keilutúpu.

,,Þetta var mjög skemmtileg viðureign. Laxinn var búinn að vera á eftir Kolskeggnum í nokkur skipti og svo endaði hann á því að negla hann," sagði Árni Friðleifsson, stjórnarmaður í Stangaveiðifélagi Reykjavíkur, í samtali við Krafla.is í gærkvöld en þá var veiði nýlokið fyrsta veiðidaginn í Norðurá og verður að segjast eins og er að fyrsti dagurinn lofar góðu. Veiðimenn settu í 8 laxa en 5 þeirra komu á land. Árni fékk laxinn á Kolskegg í veiðistað rétt ofan við Myrkhyl sem nefnist Einbúi. Árni fékk annan lax í Myrkhyl og var því með  tvo laxa í gær.

Nokkuð líf var í mörgum veiðistöðum Norðurár í gær. Greinilegt var að lax var að ganga um Munðarnessvæðið en þar voru þeir Jón G. Baldvinsson og Gunnar Örn Pétursson við veiðar. Jón setti í einn lax í Stekknum. ,,Þetta var mjög skemmtileg taka. Hann var búinn að koma nokkrum sinnum á eftir Kolskeggnum en endaði síðan á að ráðast á hann með miklum látum. Þetta var mjög skemmtilegt," sagði Jón í samtali við Krafla.is í gærkvöld. Gunnar Örn setti í þrjá laxa en heppnin var ekki með honum í gær og hann missti þá alla. Tveir laxanna tóku Kolskegg og einn Kröflu orange keilutúpu. Sannarlega líflegur dagur á Munaðarnessvæðinu í gær.

Loks veiddu hjónin Bjarni Júlíusson og Þórdís Klara Bridde fallega laxa í Myrkhyl á fyrstu vaktinni. Það var nokkuð um lax í Norðurá í gær en veiðimenn stóðu andspænis mjög erfiðum aðstæðum, mjög litlu vatni og mikilli birtu. Laxar sáust í Myrkhyl, á öllu svæðinu í nágrenni Laxfoss, í Krossholu, Klingenberg og Berghylsbroti og víðar. ,,Þetta var nokkuð líflegt og ég man ekki eftir opnun í Norðurá í fljótu bragði þar sem lax var svona dreifður um ána á þessum árstíma," sagði Guðmundur Stefán Maríasson, formaður Stangaveiðifélags Reykjavikur í samtali við Krafla.is i gærkvöld.

Það verður gaman að fylgjast með framhaldinu í Norðurá og greinilegt að flugan okkar Kolskeggur ætlar að gera það gott og byrja veiðisumarið eins og hún endaði sumarið í fyrra. Við munum áfram fylgjast með gangi mála og flytja fréttir hér á Krafla.is

Stekkurinn er glæsilegt veiðisvæði. Hér settu þeir Jón G. Baldvinsson og Gunnar Örn Pétursson í fjóra laxa í gær og þrír þeirra tóku Kolskegg flottúpu.

Hér hefur bardaginn borist nokkur hundruð metra niður Norðurá. Sjá má Laxfoss í baksýn en laxinn tók Kröfluna rétt neðan við Laxfoss. Í ánni ráða æðstu stjórnendur SVFR ráðum sínum en í landi spá þeir Kjartan Þörbjörnsson (Golli á Mogganum) og Einar Páll Sveinsson Evróvisjónhöfundur í spilin.

Vatnsmagn í Norðurá er veiðimönnum sem hófu veiðar  í ánni í morgun mjög óhagstætt. Stjórn Stangaveiðifélags Reykjavíkur byrjaði veiðina í morgun og útlitið var ekki alltof gott. Margir veiðistaðir eru ekki að halda fiski við þessar aðstæður en þó er vitað af fiski sem genginn er í ána þannig að einhverjir veiðimenn verða örugglega varir í opnuninni.

Veiðimönnum er enn í fersku minni ævintýri sem formaður SVFR, Guðmundur Stefán Maríasson, lenti í í fyrra. Eftir rólega byrjun á Brotinu, veiðistaðnum sem formaðurinn á alltaf fyrsta morguninn, renndi sér mjög vænn tveggja ára lax inn á Brotið og negldi hálftommu svarta Kröflu keilutúpu með það sama. Og eftirleikurinn var formanninum ekki auðveldur. Laxinn, sem talinn var 12-15 pund, teymdi formanninn mörg hundruð metra niður Norðurá og í mestu látunum for formaðurinn á bólakaf í ána. Leikurinn barst á Bryggjurnar en þar hafði laxinn betur eftir langa og stranga viðureign. Formaðurinn var ánægður með frammistöðu Kröflunnar eftir bardagann og sagði að þetta væri ekki í fyrsta skiptið sem Kröflurnar gerðu það gott í veiðinni hjá honum.

Í morgun kl. 07 kastaði Guðmundur Stefán aftur á Brotinu en nú voru aðstæður mun verri, mun minna vatn en í fyrra og samdóma álit fróðra manna að Brotið héldi alls ekki laxi við þessar aðstæður. Fiskar hafa sést á Eyrinni í morgun, en Eyrin er veiðistaður beint á móti Brotinu við hinn bakkann. Þar má reikna með að fyrsti lax sumarsins komi á land.

Kröflur og Kolskeggur, oftast í formi flottúpu long wing,  voru ásamt fleiri af okkar flugum að gefa góða veiði í Norðurá í fyrra. Kolskeggurinn kom svakalega á óvart og við eigum í fórum okkar lýsingar veiðimanna sem náðu löxum í Norðurá og víðar í fyrra á Kolskegg og töldu sig aldrei hafa upplifað aðrar eins tökur í laxveiði. Suma daga var allt að helingi dagsafla í Norðurá á Kolskegg. Við segjum nánar frá þessari spútnikflugu sumarsins í fyrra mjög fljótlega hér á Krafla.is  og munum einnig fylgjast vel með veiðimönnum við Norðurá og flytja fréttir hér á vefnum um leið og þær berast okkur.

Laxinn sem tók Kröflu formannsins var um 12-15 pund. Mynd Heimir Óskarsson á Vötn og veiði.