Monthly Archives: June 2009

Jæja... þá erum við komin með Facebook síðu en hana má finna hér.

Síðan verður tengd við heimasíðuna Krafla.is og munu aðdáendur Kröflu á Facebook fá fréttir og sögur af fluguveiði um leið og við birtum þær á Krafla.is. Við munum nú einnig tilkynna viðburði, tilboð og fleira á Facebook líkt og við gerum á Kröfluklúbbnum.

Endilega gerist aðdáendur Kröflu á Facebook og segið okkur hvað ykkur finnst því við erum ávallt að reyna að bæta okkur.

Vefstjórinn

Laxinn að gefa sig og hálftommu svarta Kraflan laus frá önglinum (neðst til vinstri). Laxinn á myndinni var að sögn manna sem fylgdust með viðureign formannsins á opnunardegi Norðurár 12-15 pund. Mynd Gunnar Bender

Frammistaða fjölmiðla landsins vakti mikla athygli þegar fyrstu árnar voru opnaðar fyrir laxveiðar föstudaginn  5. júní. Að venju, liggur mér við að segja, var það einn prentmiðill og einn vefmiðill sem slógu öllum hinum við. Og það rækilega.

Guðmundur Guðjónsson og félagar á Vötn og veiði voru að venju fyrstir með fréttirnar og gerðu veiðinni í Norðurá sérlega glæsileg skil. Einnig Einar Falur og Golli á Mbl.is Þrátt fyrir að veiðimenn frá SVFR væru við veiðar í Norðurá (stjórn félagsins) var fréttaflutningur á vef SVFR  afar slakur og í raun algjörlega óviðunandi. Menn virðast ekki gera sér grein fyrir því að félagsmenn og aðrir áhugamenn um veiði eru óþolinmóðir og bíða mjög spenntir eftir fyrstu fréttum. Og þegar veiði byrjar í Norðurá klukkan sjö að morgni föstudags gengur ekki að bjóða fréttaþyrstum félagsmönum upp á fréttir af opnun Norðurár mörgum klukkustundum síðar. Ég hélt að SVFR ætti græjur til að koma fréttum fljótlega inn á vefinn. Hvernig stendur á því að komið var langt fram yfir hádegi fyrsta veiðidags í Norðurá þegar félgsmönnum var boðið upp á fyrstu fréttir frá Norðurá á SVFR.is?

Framsetning Vötn og veiði í máli og myndum var einkar glæsileg fyrsta veiðidaginn í Norðurá. Fagmannlega unnin, margar myndir og maður þurfti ekki að bíða fram eftir degi eftir fréttunum. Framganga Mbl. is var einnig eftirtektarverð fyrir fagmennsku. Ekki í raun við öðru að búast þar sem starfsmenn á báðum miðlum eru reyndir frétta- og veiðimenn.

Erum við þá ekki komin að frammistöðu sjónvarpsstöðvanna? Og þvílíkur aumingjaskapur. Ekkert. Mér er sagt að Gísli ,,Út og suður"  Einarsson hafi farið í fýlu af því að hann var ekki boðaður sérstaklega á opnunarhátíð Norðurár. Sú staðreynd var allavega skýringin á því að hann mætti ekki á staðinn og var ekki viðstaddur þegar fréttnæmir viðburðir gerðust. Í kvöldfréttum RUV var aumingjaskapurinn fullkomnaður. Röflað um aflaleysi veiðimanna við Blöndu en ekki minnst á veiðimenn við Norðurá sem settu í 10 laxa fyrsta veiðidaginn. Af hverju ekki? Var það vegna þess að Gísli Einarsson fékk ekki boðskort fyrir opnun Norðurár? Ömurlegt dæmi um skort á fagmennsku í fjölmiðlun og augljóst dæmi um það þegar slakir fréttamenn eru farnir að taka sjálfan sig fram yfir gott fréttaefni.

Um Stöð 2 þarf ekki að fjölyrða. Þar á bæ ráða reynslulausir ,,unglingar" í fréttamennsku för og útkoman er ömurleg. Búið að reka þaðan flest besta fagfólkið sem kunni til verka. Staðreyndin varðandi stangaveiðimenn og byrjunina á vertíðinni og frammistöðu Stöðvar 2 auðvitað vonbrigðin ein þó ekki væru kröfurnar miklar fyrirfram.  Að Fréttastofa Stöðvar 2 skuli ekki hafa áttað sig á því að senda fólk til að dekka upphaf  laxveiðitímabilsins við Norðurá eru slík afglöp að undrun sætir. Stangaveiðimenn á Íslandi eru líklega um 80 þúsund. Eiga þeir ekki betra skilið?

Niðurstaðan er sú að netmiðlarnir mbl.is og Vötn og veiði.is fá nánast hæstu einkunn. Prentmiðlar fá misjafna einkunn. Morgunblaðið gnæfir yfir ömurlegt Fréttablaðið í umfjöllun um stangaveiði eins og á öllum öðrum sviðum. Eftir sitja ljósvakamiðlarnir með allt niðrum sig. Ljósvakamiðlarnir, sem áttu möguleika á að ná stórbrotnum myndum af slag formnns SVFR við risalax og sýna áhorfendum sínum strax sama kvöldið, voru heima við og ekki að sinna sínu starfi.

-SK

Guðmundur Stefán Maríasson, formaður Stangaveiðifélags Reykjavíkur, hnýtir svarta Kröflu á taumendann skömmu fyrir fyrstu köstin í Norðurá þetta sumarið. Myndir tók Gunnar Bender.

,,Þetta var svakaleg viðureign. Ég hef fengist við marga laxa í Norðurá í gegnum árin en þetta er lang skemmtilegasta viðureignin sem ég hef lent í. Þetta var mikið ævintýri og ekki í fyrsta skipti sem Kraflan kemur mér í samband við væna og skemmtilega laxa. Þetta var mjög vænn lax, 12-15 pund. Hann var klókur eins og vænna laxa er siður. Hefur eflaust nýtt sér vandræði mín á tímabili í viðureigninni og því hafði hann betur. Ég er í raun mjög sáttur við endalokin. Barátta hans og kraftur skilaði honum sigri og mér mikilli ánægju og í raun átti hann skilið að sleppa," sagði Guðmundur Stefán Maríasson," formaður Stangaveiðifélags Reykjavíkur, í samtali við Krafla.is að afloknum fyrsta veiðidegi sumarsins í Norðurá.

Guðmundur Stefán mun lengi muna eftir þessari viðureign: ,,Ég byrjaði með tommu langa svarta Kröflu. Það gekk ekki og ég minnkaði í 1/2". Þegar Kraflan var í rennsli alveg neðst á Brotinu réðst fiskurinn á hana og takan var mögnuð. Fiskurinn var greinilega að mæta á svæðið og um leið og hann renndi sér inn á Brotið tók hann Kröfluna. Síðan skipti engum togum að hann rauk niður ána og langt niður á undirlínu. Ég mátti hafa mig allan við að fylgja honum eftir, datt í ána og þá kom fát á mig. Ég

sleppti stönginni og leist ekki á þetta á tímabili. Síðan náði ég stönginni aftur, náði að grípa í stangartoppinn og fljótlega fann ég að ég var enn í sambandi við laxinn mér til mikillar ánægju. Laxinn var hins vegar klókur og hafði náð að festa tauminn í steinum og á endanum gaf taumurinn sig og það slitnaði. Það var eiginlega grátlegt því laxinn var orðinn mjög þreyttur. Hausinn kominn upp úr en því miður gaf taumurinn sig," sagði Guðmundur og bætti við að taumurinn sem eftir var við flugulínuna hafi verið laskaður og ,,særður" eftir nudd við grjót. Enginn skyldi velkjast í vafa um að vænir laxar vita nákvæmlega hvað þeir eru að gera í bardaga sínum við veiðimenn og hvernig best er að nýta sér aðstæður.

Ekkert er hægt að fullyrða um stærðina á fiskinum. Margir voru á því að þetta hafi verið 12-15 punda fiskur. Á myndum sem fylgja með þessari frétt má glögglega sjá að þetta var ekki 10 til 11 punda fiskur. Á mælikvarða Norðurár hin síðari ár var þetta risi. Vonandi kemur krókurinn sem fastur er í kjaftviki hans ekki til með að há honum og eflaust mun hann losna við krókinn ef hann tekur agn veiðimanna á ný síðar í sumar.

Þetta eru puttar formanns SVFR. Guðmundur Stefán Maríasson hnýtir tommulanga svarta Kröflu á taumendann rétt fyrir klukkan sjö við opnun Norðurár. Skömmu síðar skipti formaðurinn og setti hálftommu langa svarta Kröflu undir og þá varð allt vitlaust.

,,Hvað skal nú til varnar verða vorum sóma?" Formaður og varaformaður SVFR horfast í augu við erfiðar aðstæður, mjög vænan og klókan stórlax sem hafði betur að lokum.

Hér sést laxinn örþreyttur eftir langan og strangan bardaga. Farinn að sýna kviðinn og greinilega mjög vænn lax hér á ferð. Myndina tók Heimir Óskarsson hjá veiðivefnum Vötn og veiði. Tókum við hana ófrjálsri hendi og biðjumst velvirðingar á því.

Miklir snillingar á ferð. Frá vinstri: Gylfi Gautur Pétursson, varaformaður SVFR, Jón Þór Júlíusson hjá Lax ehf. og Guðmundur Stefán Maríusson, formaður SVFR fylgjast með gangi mála við Norðurá í gær.

,,Það komu sex laxar á land og fjórir laxar höfðu betur í baráttunni við veiðimenn. Það er alveg óhætt að segja að þetta hafi verið líflegur dagur og meira af laxi á ferðinni en á sama tíma í fyrra og mun meira en árið 2007. Gróður hér við Norðurá og allt fuglalíf er mun fyr á ferðinni en í fyrra. Af hverju ætti laxinn ekki að vera fyr á ferðinni líka?," sagði Grétar Þorgeirsson, veiðivörður við Norðurá, í samtali við okkur á Krafla.is í gærkvöld.  Stjórnarmenn í Stangaveiðifélagi Reykjavíkur höfðu þá lokið veiði fyrsta dag sumarsins og afraksturinn var sá hinn sami og hollið náði í heildina í opnun Norðurár í fyrra ef okkur misminnir ekki.

Stjórnarmenn og konur þeirra settu í tíu laxa og náðu sex þeirra. Mestur söknuður auðvitað í Kröflulaxi formannsins sem hafði alla burði til að geta verið með stærstu löxum sumarsins í Norðurá.

Mikill hamagangur á Eyrinni. Þarna má greina Marinó Marinósson og Eirík Stefán Eiríksson, fyrir miðri mynd.

Stjórnarmaður sem var við veiðar á Eyrinni seinni part fyrsta veiðidagsins sagði greinilegt að fiskur væri að ganga af þó nokkrum krafti og kannski óþekktum hin síðari ár í byrjun júní. Þá fréttum við af veiðimönnum sem voru við veiðar á svæði Munaðarness fyrsta veiðidaginn að lax hefði stokkið nokkuð við Engjanefið sem er neðst á svæðinu við Munaðarnes. Loks fréttum við það í gærkvöld að einn lax væri genginn í gegnum teljarann í Glanna.

Samkvæmt okkar heimildum veiddu þau Þórdís Bridde, Marinó Marinósson, Gylfi Gautur Pétursson, Kristín Jónsdóttir (eiginkona Guðmundar Stefáns formanns) og Mjöll Daníelsdóttir (2) laxana sem á land komu fyrsta veiðidaginn. Allir tóku laxarnir á Eyrinni nema einn sem Mjöll Daníelsdóttir, ráðskona í veiðihúsinu við Norðurá,  fékk í Myrkhyl.

Bjarni Júlíusson, fyrrverandi formaður SVFR, Bernhard A. Petersen, stjórnarmaður í SVFR misstu sinn hvorn laxinn í gær og Guðmundur Stefán formaður missti tvo, á Brotinu og Eyrinni.